Хүн төрөлхтөний эв нэгдэл, харилцан ойлголцол, нөхөрлөл түншлэлийн их баяр зуны спортын ХХХ олимпын наадам, паралимпын 14-р наадам Лондон хотноо эхлэхэд 169 хоног үлдээд байна.

Монгол Улсын Ерөнхий сайд С.Батболд Олимпд бэлтгэх үндэсний хорооны даргын хувьд баг тамирчид, дасгалжуулагчид бэлтгэл сургуулилтаа улам эрчимжүүлж Лондонгийн тэнгэрт МУ-н төрийн далбааг олонтой мандуулж, төрийн дууллаа эгшиглүүлнэ гэдэгт итгэл дүүрэн байгаагаа хэлээд  Биеийн тамир, спортыг хөгжүүлэх, тамирчдын ур чадварыг дээшлүүлэх, тив, дэлхий, Олимпын наадамд амжилттай оролцоход  мэргэжлийн холбоодын үүрэг, хариуцлага оролцоо өндөр байдгийг “Биеийн тамир, спортын хөгжлийн шинэ чиг хандлага” үндэсний зөвлөлгөөний үеэр тэмдэглэлээ.

Ийнхүү Ерөнхий сайд Батболд биеийн тамир, спортын материаллаг бааз, төсөв санхүүжилт, удирдлага, зохион байгуулалт зэрэг олон асуудлыг төлөөлөгчид нухацтай хэлэлцэж тодорхой үр дүнтэй санал, дүгнэлтүүдийг гаргана гэдэгт найдаж байгаагаа элсэн. Мөн  Монголын иргэд эрүүл чийрэг, бие бялдар, оюуны өндөр чадамжтай байж, манай улсын тамирчид Олимп, дэлхий, тивийн хэмжээний тэмцээн, уралдаанд ямагт хошуучилж байхын өлзийтэй ерөөлийг дэвшүүлжээ.

Засгийн газрын тогтоолоор 2011 онд Олимп, тивийн наадам, дэлхийн зэрэглэлийн тэмцээнд медальт байрт шалгарч амжилт гаргасан 106 тамирчин, 43 дасгалжуулагчдад 586 сая төгрөгийн мөнгөн шагналаар урамшуулан шагнасан байна.

Монгол Улсын Засгийн газраас Олимпид бэлтгэх үндэсний шигшээ багийн төсвийг жил бүр нэмэгдүүлж ирсэн бөгөөд 2012 оны олимпын бэлтгэлд зориулж 4.5 тэрбум төгрөг төсөвлөжээ.

Түүнчлэн 2011 онд  спортын ордон 8, цэнгэлдэх хүрээлэн 5-ыг улсын төсвөөр барьж ашиглалтад оруулж, улсын хэмжээнд спортын заал 655, биеийн гадаа талбай 1180, спортын төрөлжсөн анги сургууль 24, бялдаржуулах, чийрэгжүүлэх төв танхим 587, Биеийн тамирын хамтлаг 1361 үйл ажиллагаагаа явуулж байна.

 

Суртaлчилгаа

Суртaлчилгаа