Төрийн өмчит “Эрдэнэс Монгол” ХК-ийн охин компани “Эрдэнэс Тавантолгой” компанитай гэрээ байгуулан Өмнөговь аймгийн Тавантолгойн ордоос олборлосон нүүрсийг Цагаан хад хүртэл тээвэрлэж буй “Гео транс”, “Хурд”, “Шанд хурай” зэрэг тээврийн 20-иод компанийн 300-аад жолооч өнөөдрийг хүртэл нэг, хоёрдугаар сарынхаа цалинг авч чадаагүй байна.

Дээрх тээврийн компаниуд Төрийн өмчит “Эрдэнэс Тавантолгой” ХХК-тай байгуулсан гэрээний дагуу бол сар бүрийн эхний 10 хоногт мөнгөө шилжүүлэх ёстой аж. Гэтэл төрийн өмчит компани мөнгө байхгүй гэдэг шалтгаанаар тээвэрлэлтийн мөнгөө шилжүүлэхгүй байгаагаас жолооч нар цалингаа авч чадахгүй байгаа юм байна.

Монголын ард түмний уламжлалт баяр болох Цагаан сар долоо хоногийн дараа болно. Гэр бүл, аав ээж, ах дүү нар руугаа яарсан жолооч нар хэнд хандахаа мэдэхгүй байна гээд манай редакцид хадсан юм. Жолооч Б-гийн хэлж буйгаар Тавантолгойн ордоос  Цагаан хад хүртэл 250 гаруй км зам туулдаг. Хоногт 100 тн-ын даацтай 100 гаруй машин зогсолтгүй тээвэрлэлт хийдэг гэнэ. Гэтэл  “Эрдэнэс Тавантолгой” компани мөнгөгүй гээд байгааг ойлгохгүй байна. Олсон мөнгө нь хаашаа орж байгааг мэдэхгүй гэв. Хэдийгээр Монголын үнэт баялаг болсон “хар алт”-ыг гадагшаа зөөж байгаадаа харамсдаг ч амьдрахын эрхэнд энэ ажлыг хийж байна даа гэж хэлж хэлсэн юм.

 

Суртaлчилгаа

Суртaлчилгаа